Прэзідэнт Беларусі Аляксандр Лукашэнка на нарадзе з кіраўніцтвам Савета Міністраў паставіў задачы па найбольш актуальных і вострых тэмах парадку дня. Кіраўнік дзяржавы, у прыватнасці, паставіў задачы перад аграрным сектарам, выказаўся аб вострай сітуацыі на граніцы з мігрантамі, даў даручэнні па рэагаванні на санкцыі Захаду ў адносінах да Беларусі, выказаўся на тэму лячэння ў Беларусі пацыентаў ад каранавіруса.
Праект указа аб рэфармаванні прадпрымальніцкай дзейнасці
Пытанне рэфармавання прадпрымальніцкай дзейнасці стала адной з тэм нарады кіраўніка дзяржавы з кіраўніцтвам Савета Міністраў. Прэзідэнт нагадаў, што ім была пастаўлена задача павысіць ступень удзелу суб’ектаў малога прадпрымальніцтва ў фінансаванні дзяржаўных расходаў. Урад выпрацаваў пэўныя падыходы, і на зацвярджэнне кіраўніка дзяржавы ўнесены праект указа «Аб дзейнасці суб’ектаў малога прадпрымальніцтва».
Аляксандр Лукашэнка папярэдзіў: работа ў ценявым сектары недапушчальна. «У выніку мы павінны мець яснае ўяўленне аб далейшых этапах карэкціроўкі падаткаабкладання ўсіх суб’ектаў малога бізнесу. Пры гэтым за спробамі паляпшэння мы павінны бачыць у першую чаргу інтарэсы нашых грамадзян», — дадаў Прэзідэнт.
«Гэта не значыць, што мы цяпер непасільнымі падаткамі абкладзём малое прадпрымальніцтва і прадпрымальніцтва наогул, што яно ўсё загнецца. Не, нам гэта не трэба. Нам трэба, каб і малое, і сярэдняе, і буйное прадпрымальніцтва развівалася, каб у Беларусі з’яўлялася ўсё больш і больш прадпрымальнікаў. Трэба вызначыць так, каб яны маглі плаціць пасільны падатак. Перагібаў тут быць не павінна, але плаціць павінны ўсе. Хоць па адной капейцы, але плаціць», — падкрэсліў беларускі лідар.
Пасля абмеркавання дакумента кіраўнік дзяржавы даручыў ураду дапрацаваць яго. Таму гэта тэма яшчэ будзе гучаць на прэзідэнцкім узроўні.
Пра эпідсітуацыю: расслабляцца ні ў якім разе нельга
Прэзідэнт канстатаваў, што захваральнасць на COVID-19 у Беларусі стала паступова змяншацца і аб гэтым можна гаварыць не з асцярожным аптымізмам, як раней, а з упэўненасцю. У сувязі з гэтым Аляксандр Лукашэнка звярнуў увагу на неабходнасць паступова вяртаць да звычайнай работы тыя клінікі, якія раней былі перапрафіляваны пад лячэнне хворых з каранавірусам.
Аднак зніжэнне захваральнасці нельга лічыць падставай, каб расслабляцца, упэўнены кіраўнік дзяржавы. «Не расслабляйцеся. Мы зноў жа не ведаем, як паводзяць сябе гэтыя вірусы. Мы яшчэ не ведаем, як паўплывае на наша грамадства грып. Яго цяпер няма, нават адзінкавых (выпадкаў. — Заўвага БЕЛТА). Кавід, як мы гаварылі, выцесніў грып. Але мы не ведаем, як будзе далей. Таму расслабляцца ні ў якім разе нельга», — падкрэсліў беларускі лідар.
Аб гатоўнасці жорстка адказаць на новыя пакеты санкцый
«Занадта многа нас пачалі палохаць пятым пакетам. На гэты пяты пакет, Раман Аляксандравіч (прэм’ер-міністр Раман Галоўчанка. — Заўвага БЕЛТА), вам было даручэнне: мы ім дараваць нічога не павінны. Польшча нас палохае, што закрые граніцу. Калі ласка, закрывайце: менш збеглых туды будзе перамяшчацца. Пытанне не ў гэтым. Я проста паслухаў гэтых нягоднікаў, якія наогул безгаловыя. А калі мы закрыем транзіт праз Беларусь? Праз Украіну не пройдзе: там расійская граніца закрыта. Праз Прыбалтыку дарог няма. Калі мы закрыем для палякаў і, напрыклад, для немцаў, што будзе тады? Мы не павінны, абараняючы свой суверэнітэт і незалежнасць, спыняцца — ні перад чым», — падкрэсліў Аляксандр Лукашэнка.
Кіраўнік дзяржавы даручыў забяспечыць кантроль за перамяшчэннем войскаў НАТА і Польшчы. «Вы павінны іх бачыць, і ў вас павінны быць планы процідзеяння, не дай бог што. Мы не разгортваем (я такіх указанняў не даваў) сваю групоўку Узброеных Сіл. Але бачыць мы павінны. І прадбачыць усё. Каб нам не ўчынілі там на граніцы вайнушку, а мы будзем да гэтага не гатовы», — падкрэсліў Аляксандр Лукашэнка.
Падрыхтавана па матэрыялах БЕЛТА
