Прэзідэнт Беларусі Аляксандр Лукашэнка ў рамках рабочай паездкі па рэгіёнах, пацярпелых ад катастрофы на Чарнобыльскай АЭС, наведаў Нараўлянскі раён. Кіраўніку дзяржавы далажылі аб сацыяльна-эканамічным развіцці Гомельскай вобласці і раёна, перспектывах далейшага развіцця 30-кіламетровай зоны вакол Чарнобыльскай АЭС. Размова таксама ішла аб рэалізацыі мерапрыемстваў дзяржаўнай праграмы па пераадоленні наступстваў чарнобыльскай катастрофы.
«Мы бачым, што тут можна жыць і працаваць» — Аляксандр Лукашэнка даручыў зрабіць чарговы крок у развіцці чарнобыльскіх раёнаў.
Прэзідэнт Беларусі Аляксандр Лукашэнка патрабаваў выразнага планавання і разліку ў пытанні развіцця пацярпелых ад аварыі на ЧАЭС тэрыторый. Напрыклад, у Нараўлянскім раёне акрамя самога райцэнтра ёсць яшчэ шэраг населеных пунктаў, у тым ліку аграгарадкоў. Кіраўнік дзяржавы падкрэсліў, што на перспектыву важна разумець, дзе менавіта будуць жыць людзі ў гэтых рэгіёнах. Гаворка не толькі пра Нараўлянскі, але і пра Брагінскі, Хойніцкі раёны, іншыя тэрыторыі.
Адпаведна, вакол буйных населеных пунктаў і саміх райцэнтраў варта ў першую чаргу планаваць развіццё тых ці іншых відаў напрамкаў эканамічнай дзейнасці, стварэнне працоўных месцаў. Гэта не толькі сельская гаспадарка, але і лясная галіна, турызм, невялікія вытворчасці і іншыя сферы.
«Павінны быць буйныя населеныя пункты. Трэба дакладна ўяўляць, дзе будуць жыць людзі», — заявіў кіраўнік дзяржавы.
Цяперашняе становішча спраў і працу ў гэтым напрамку кіраўнік дзяржавы лічыць недастаткова здавальняючымі. «Мне здаецца, мы так, ад выпадку да выпадку займаемся гэтай зонай», — сказаў Прэзідэнт, арыентуючы службовых асоб на дасягненне больш значных вынікаў.
Аляксандр Лукашэнка патрабаваў комплекснага падыходу і даручыў ўсё дадаткова прадумаць і прапісаць у адпаведнай праграме. Асаблівы акцэнт ён зрабіў на развіцці лясной гаспадаркі, уключаючы лесааднаўленне, лесанарыхтоўку, перапрацоўку. «Трэба ў цэлым вызначыцца, што мы тут будзем рабіць. Нельга кідаць гэтыя землі», — падкрэсліў беларускі лідар. Ён адзначыў, што дзяржава не кінула гэтыя землі, многае зроблена, але патрэбен большы вынік.
Аляксандр Лукашэнка падкрэсліў, што трэба зрабіць максімум за бягучую пяцігодку. «Мы павінны за кошт поўдня Беларусі дабавіць у самой Беларусі. Гэта наш рэзерв, на які мы не звярталі ўвагі. Прыйшоў час і гэтыя землі — адназначна вызначыцца і падняць іх. Калі мы гэта не зробім, цяперашняе пакаленне, ніхто не зробіць яшчэ 35 гадоў», — сказаў ён.
«Патрэбна новая канкрэтная праграма з пунктамі — дзе будуць жыць людзі і чым яны будуць займацца. За лета ўрад са спецыялістамі падрыхтуе канкрэтную праграму з адказамі на пытанне, што мы будзем рабіць у запаведніку», — сказаў Прэзідэнт.
«Я кожны год таптаў гэтыя землі і пераканаўся, што рашэнне правільнае. Жыць і працаваць тут можна. Гэта ўжо не стратэгія. Стратэгія зразумелая. І мы павінны рэалізаваць яе праз канкрэтныя праграмы і інвестыцыі», — заявіў Аляксандр Лукашэнка.
Кіраўнік дзяржавы расказаў, што першай яго задачай 20 з лішнім гадоў таму было зрабіць так, каб сышоў страх у дачыненні да тэмы Чарнобыля: «Дзесьці запалохалі — аб’ектыўна, суб’ектыўна. Сітуацыя была няпростая. Трэба было супакоіць людзей, разабрацца самім. Трэба было псіхалагічна пераадолець гэты страх».
У Гомелі была створана навуковая і медыцынская база па вывучэнні адпаведных праблем, а цяпер айчынныя напрацоўкі запатрабаваныя і ў іншых краінах, у прыватнасці ў Японіі.
Далей на працягу гадоў вялася далейшая праца па адраджэнні і рэабілітацыі чарнобыльскіх тэрыторый. «Мы зрабілі шэраг крокаў і прадэманстравалі людзям, што тут трэба і можна жыць, — сказаў Прэзідэнт. — Мы пераадолелі псіхалагічна гэты бар’ер. Потым пачалі паволі даследаваць землі. І мы бачым, што іх трэба ў абарот запускаць».
Прэзідэнт Беларусі адзначыў, што час паказаў правільнасць абранага шляху. «За лета мы створым праграму і будзем бачыць, што трэба ў Нароўлі, што ў Брагіне, што ў Хойніках. Гэта тры асноўныя раёны. Ветку мы больш-менш падцягнулі. І будзем бачыць, што нам трэба яшчэ зрабіць на поўдні Беларусі. Яшчэ дзе-небудзь штосьці пабудуем у іншых раёнах, якія не так забруджаныя, як гэтыя тры», — сказаў Аляксандр Лукашэнка.
Ён адзначыў, што гэта будзе трэці буйны крок у засваенні гэтых тэрыторый. «Ну не можам мы поўдзень Беларусі аддаць прыродзе. Мы павінны ад гэтай прыроды нешта атрымаць. Акуратна, не перахіляючы. Галоўнае, вядома, бяспека, каб людзі сябе адчувалі ў бяспецы, не баяліся. Мы на практыцы пераканаліся, што паступілі правільна, што не кінулі гэтыя землі», — дадаў кіраўнік дзяржавы.
Кіраўнік дзяржавы падчас паездкі на Гомельшчыне адказаў на шматлікія пытанні журналістаў.
Як паведамлялася падчас рэспубліканскага суботніка, Аляксандр Лукашэнка анансаваў падпісанне важнага дэкрэта. Паводле яго слоў, гэты дакумент павінен стаць адным з найважнейшых рашэнняў за гады яго прэзідэнцтва. Больш падрабязна кіраўнік дзяржавы тады распавядаць не стаў, і «эксперты» пачалі фантазіраваць: «Лукашэнка здасць Беларусь Расіі», «У Беларусі размесцяць расійскую ваенную базу…»
На Гомельшчыне Аляксандр Лукашэнка растлумачыў, што анансаваныя ім рашэнні будуць тычыцца выключна ўнутранай сітуацыі ў краіне і адкажуць на пытанне: што калі апанентам улады ўдасца замах на Прэзідэнта?
«Скажыце, калі заўтра няма Прэзідэнта, вы гарантуеце, што ўсё будзе нармальна? Не. Таму на гэты выпадак я падпішу ў бліжэйшыя дні дэкрэт, як будзе выбудаваная ўлада ў Беларусі. Прэзідэнта застрэлілі — на заўтра Савет бяспекі будзе надзелены паўнамоцтвамі. Трэба ўводзіць надзвычайнае становішча імгненна, аж да ваеннага, калі хтосьці на мяжы паварухнецца. І Савет бяспекі павінен прымаць рашэнне, — распавёў Аляксандр Лукашэнка. — Таму я казаў, што падпішу гэты дэкрэт і вызначу, хто будзе кіраваць краінай «калі раптам».
Пры гэтым кіраўнік дзяржавы адзначыў, што такая неабходнасць наўрад ці наступіць, але губляць пільнасць нельга. Аляксандр Лукашэнка дадаў, што рашэнне аб прыняцці падобнага дэкрэта было прынята ім даўно. «Калі гэта ўсё разгортвалася. А не тое што я хачу каму-небудзь што-небудзь здаць ці здрадзіць. Хлопцы, ніколі гэтага не будзе. Я гатовы на ўсё, але толькі каб захаваць маю і вашу краіну», — заявіў Прэзідэнт.
Лукашэнка распавёў і пра асноўную тэму перамоваў з Пуціным. «Мы ў канкрэтыку акунуліся. На аснове кааперацыі мы павінны ўдыхнуць у многія вытворчасці новае жыццё. У гэтым сутнасць інтэграцыі — апусціцца на зямлю і зрабіць тое, што нам сёння вельмі неабходна. Ніхто нас ніколі не падтрымае. Сведчанне таму цяперашні час: санкцыі супраць іх, санкцыі супраць нас. І гэта толькі пачатак. Нас будуць душыць-душыць», — заявіў кіраўнік дзяржавы.
Аляксандр Лукашэнка адзначыў, што тэмы развіцця інтэграцыі, новых саюзных праграм таксама абмяркоўваліся, але больш для пратаколу ў пачатку размовы. «Гэта правільна, але гэта занадта агульна. Мы на гэты раз звярнуліся з Уладзімірам Пуціным да надзённых пытанняў: кошты на вуглевадародную сыравіну — газ, нафту, кааперацыя», — распавёў Лукашэнка.
Кіраўнік дзяржавы таксама адрэагаваў на развагі некаторых аналітыкаў і апазіцыянераў на прадмет яго перамоў з Прэзідэнтам Расіі ў наступным плане: «А, Лукашэнку ў кут загналі, дзявацца няма куды! Усё, Расія паглынула». «Нават размовы пра гэта не ішло. І сёння ім хочацца нас штурхнуць на гэты шлях», — падкрэсліў Лукашэнка. «Таму нам трэба дзейнічаць і не дапускаць памылак. Калі б я паехаў, як яны вяшчалі, прадаваць або здаваць Беларусь, слухайце, гэта б ім падарунак быў. А нам гэта не трэба. Я ўжо колькі разоў казаў: я — першы Прэзідэнт нашай незалежнай Беларусі, нам пашчасціла з вамі пабудаваць першую незалежную дзяржаву. Які Лукашэнка можа пайсці супраць гэтага і разбурыць яе ці камусьці здаць, ці кудысьці ўнутр далучыць?! Я больш за ўсё зацікаўлены, каб мы былі незалежныя», — сказаў Прэзідэнт.
Па матэрыялах БЕЛТА
