Фестывальны вечар аматарскай творчасці «Ветка Пасожжа» зноў паклікаў гледачоў у звычайную свяцілавіцкую хату. Народны клуб аматараў народнай песні «Ля самавара» Свяцілавіцкага ЦКД, які ў чарговы раз пацвердзіў сваё званне, запрасіў на вячоркі на сучасны лад жыцця.
Па рэжысёрскай задумцы гаманкія баба (бухгалтар філіяла «Свяцілавіцкая УБ» Ганна Лебедзева) і дзед (акампаніятар гуртка дзіцячага калектыву «Задорынка» Сяргей Дамасканаў) у вышыванках прывячалі ў сваёй хаце доўгім восеньскім вечарам суседзяў ды вяскоўцаў. І першым да гаспадароў завітаў Хвядос (мясцовы жыхар Дзмітрый Жадавец) — чалавек з філасофскім складам розуму. 
Яго турбавалі не пытанні паўсядзённага побыту, а клопаты сусветнага маштабу. Глабальнае пацяпленне, імклівы рост цэн, НАТА — вось што непакоіла чалавека з высокімі памкненнямі. Але прыбліжаныя да зямнога жыцця баба з дзедам вельмі хутка перавялі гэтыя роздумы ў кола акольных пытанняў. Ды і шматлікія госці, якія падаспелі да вячорак, ім у гэтым дапамаглі.
Жанчыны (маладая маці Вольга Гулійева, санітарка Свяцілавіцкай бальніцы Таццяна Варывода, даглядчыца СПП «Свяцілавічы» Тамара Падабедава, выконваючая абавязкі дырэктара ЦКД Антаніна Есіпенка, тэхнічны работнік Свяцілавіцкага сельвыканкама Антаніна Сеўрук, а таксама пенсіянеркі Вера Кажамякіна, Надзея Баранава і Марыя Марчанка) з імпэтам і добрым сялянскім гумарам дзяліліся між сабой вясковымі навінамі, уласнымі перажываннямі і крыўдамі. Час ад часу гамонка перарывалася народнымі песнямі, што мілагучнай трэллю разліваліся па зале для гледачоў.
Але, як бывае амаль заўсёды, калі канцэнтрацыя жанчын дасягае крытычнага ўзроўню, вячоркі бабы Ганны набылі скандальную афарбоўку. Наталля (кіраўнік гуртка Галіна Фабрычкіна) і Вольга (бібліятэкар Вольга Гатальская) у спрэчцы за сіта амаль дайшлі да жартаўлівай бойкі.
Ды чарговая порцыя вясковых навін прымірыла суседак і ўключыла іх у агульную плынь гутаркі. І нішто так не ўзбударажвае сельскае жыццё, як з’яўленне на вуліцах новага чалавека. Так сталася, што ў хату на вячоркі завітаў Махмуд (кіраўнік клуба «Ля самавара» Джэйхун Гулійеў) — этнограф, фалькларыст і знаўца народных песень. Дарэчы, ён не толькі спяваў разам з жанчынамі, але і танчыў народныя танцы «Базар», «Страданія» і «Падыспан».
На адзін вечар калектыў Свяцілавіцкага сельвыканкама прыадкрыў крышачку дзверы вясковай хаты і запрасіў веткаўчан да сябе ў госці. Але чараўніцтва народнай культуры хутка скончылася, і сяляне, развітваючыся, прызначылі дату наступнай сустрэчы… прыблізна праз год.
Ганна КОДАЛАВА.
