Жительница города Ветка задается вопросом «Дарогі ў Ветцы — адны з лепшых?»

vetkovski_raion uliza  LeninaПрачытала ў “Голасе Веткаўшчыны” (ад 2 красавіка 2016 г.) звесткі пра тое, што 7 мая адбудзецца раённы суботнік па добраўпарадкаванні тэрыторыі, а атрыманыя ад яго правядзення грашовыя сродкі будуць накіраваны на паляпшэнне і ўтрыманне тэрыторый і аб’ектаў г. Веткі і сельскіх населеных пунктаў раёна, а таксама на іншыя расходы.

Часта ў размовах з веткаўчанамі даводзіцца чуць нараканні на якасць дарог у Ветцы. Калі на плошчы і цэнтральных вуліцах асфальтавае пакрыццё дарог роўнае, то пра канцавыя вуліцы гэтага і блізка не скажаш.

Чамусьці падчас правядзення многіх (малых і вялікіх) суботнікаў найбольшая ўвага аддаецца добраўпарадкаванню гарадскога сквера: увосень і вясной жыхары Веткі нястомна зграбаюць апалае лісце на тэрыторыі ўсяго сквера, не даючы стварыцца перагною, якім жывяцца дрэвы. Веткаўчане зачакаліся цацанак-абяцанак: як ляжалі па абодва бакі сквера старыя пліткі, так і ляжаць да сённяшняга дня. Паміж пліткамі — цэлыя разоры пяску. Далёка не кожная жанчына адважыцца прайсці па Чырвонай плошчы ў туфлях на высокіх абцасах: пасля двух-трох дзён такога праменаду туфлі можна смела выкідаць у сметніцу.

Пра неабходнасць быць уважлівымі да экалогіі выказваўся старшыня камітэта прыродных рэсурсаў і аховы навакольнага асяроддзя Мінгарвыканкама Аляксандр Баравікоў: “Убирая опавшую листву в парках, скверах, человек нарушает естественный кругооборот в природе. Уборкой мы фактически обедняем землю. От этого начинают страдать деревья. Запрет на сбор опавшей листвы поможет не только сохранить экологический баланс, но и сэкономить бюджетные деньги”. (Інфармацыя БЕЛТА.)

13 лістапада 2013 г. было прынята рашэнне Мінскага гарадскога Савета дэпутатаў №366 “Об утверждении правил благоустройства и содержания города Минска и признании утратившими силу некоторых решений Минского городского Совета депутатов». Паводле гэтага рашэння: “(Пункт 20. Специализированные организации по озеленению осуществляют: …уборку листвы с озеленённых территорий проспектов, площадей и прилегающих к ним объектов внешнего благоустройства (скверы, бульвары) с озеленённых территорий вдоль улиц на ширину 10 метров от пешеходных дорожек или улично-дорожной сети, в парках и на территориях с древесно-кустарниковой растительностью (лесопарки, рощи, сады вдоль пешеходных дорожек, площадок шириной 5 метров)». Дарэчы, у гэтым жа рашэнні даводзіцца наступнае: «…скашивание газонов на объектах категории «Центр» — не менее 1 раза в 10 дней, на остальных объектах — не реже 1 раза в 15 дней в парках и лесопарках вдоль площадок пешеходных дорожек шириной 5 м, за исключением мест произрастания дикорастущих растений, относящихся к видам, включённым в Красную книгу Республики Беларусь».

Вываз апалага лісця, затрата працоўнага часу прадугледжвае грашовыя выдаткі. Мінчане на дзяржаўным узроўні, наколькі магчыма, стараюцца эканоміць. А веткаўчане? У жыхароў горада Веткі заробкі значна меншыя, чым у жыхароў сталіцы. І калі з людзей з іх добраахвотнай згоды (!) вылічваюцца грошы, дык няхай яны ідуць на сапраўды карысныя для горада справы. Маю на ўвазе наступнае.

У Ветцы ёсць прыгожая гістарычная вуліца Першамайская. Да 29 студзеня 1924 года яна мела назву Манастырская (Пралетарскія завулкі называліся Келейнымі). Так вуліцу называлі ў ХІХ ст. і пазней. Зразумела, чаму: на ёй размяшчаўся Веткаўскі мужчынскі манастыр, таксама — Пакроўская стараабрадніцкая царква.

Паглядзець гістарычную вуліцу — Першамайскую — імкнуцца многія зацікаўленыя людзі, якія прыязджаюць, каб убачыць калекцыі славутага Веткаўскага музея стараабрадніцтва і беларускіх традыцый імя Ф.Р. Шклярава. У апошнія гады з’явілася тэндэнцыя: людзі прыязджаюць сем’ямі, на сваіх машынах. Так, у 2015 г. пабыло ў музеі 1313 адзінкавых наведвальнікаў, у іх ліку — 116 замежнікаў (значная іх колькасць — госці з Расіі, Украіны). Госці горада просяць паказаць, дзе знаходзіцца былая вуліца Манастырская. Едуць па ёй, усё роўна як па глухой лясной дарозе. Паўсюль на ёй, а таксама на паваротах на завулкі — выбоіны. Псуюцца дэталі ў машынах, нервы — не толькі ў вадзіцеляў, а і ў пешаходаў, таксама — уяўленне, якое склалася ў апошнія гады: беларускія дарогі — адны з лепшых.

Шаноўныя кіраўнікі, раённы Савет дэпутатаў 27-га склікання!

  1. Пераканаўчая просьба да Вас: накіраваць неабходную частку грашовых сродкаў, утрыманых з веткаўчан у сувязі з правядзеннем суботніка, які адбыўся 7 мая 2016 г. ды іншых суботнікаў, на добраякасны рамонт дарогі па вул. Першамайскай (пажадана — і па вул. Савецкай, Пушкіна ды іншых, аддаленых ад цэнтра горада).

На рамонт дарог неабходна выдаткаваць тыя значныя грашовыя сродкі, якія выплачваюцца вадзіцелямі ўласных аўто ў выніку праходжвання штогадовага тэхагляду.

  1. На адной з сесій Веткаўскага раённага Савета дэпутатаў прыняць рашэнне “Аб зацвярджэнні правіл добраўпарадкавання і ўтрымання г. Веткі”, адзін з пунктаў якога быў бы аналагічны пункту 20 рашэння Мінскага гарадскога Савета дэпутатаў ад 13 лістапада 2013 г.
  2. Радзей скошваць газоны, радзей хаатычна (без парадку) абразаць галіны на дрэвах, якія выжываюць паміж дарогай і тратуарам, напрыклад, па вуліцы Грамыка (г. Ветка), ды і на іншых. Паглядзіце на гэтыя хворыя дрэвы: на ствалах некаторых з іх на адну трэць няма кары — прамы вынік бясконцых абрэзак.

Ветка павінна быць “зялёнай” (так аднойчы назваў яе паэт-зямляк Дзмітрый Кавалёў), прыгожым, квітнеючым, утульным горадам!

Ларыса РАМАНАВА.

Оставьте ответ

Ваш электронный адрес не будет опубликован.